الاعدام شنقا...للمنتحر حرقا

كامل الناس تعرف بلي الانتحار حرام...وبلي لي يقتل روحو خاسر دنيا وآخرة وظلم كبير ليماه وفاميلتو....ماشي غير ليه هو برك...مساكن كيفاش يقدرو ينساو...كلمة انتحار وحدها تخلي دم البنادم يجمد في عروقو...خلي يا كي تسمع بليواحد صغير وجاي لدنيتو قتل روحو بالنار...وحرق روحو وهو حي في الدنيا قبل الاخرة...بصح هي هي...تموت محروق ولا تاكلك حوتة في البحر...كي موسى الحاج كي الحاج موسى الحاجة اللي ما فهمتهاش...كيفاش واحد /وحدة عامل روحو قاري وفاهم...وواحد عايش في هاد البلاد ويشوف الحالة بعينيه...كيفاش يعطيه خاطرو...يخمم بلي هاداك المغبون ولاهاديك المغبونة لي حرقو رواحهم....داروها كوبياج باش يتشهرو كيما البوعزيزي...وينسى شحال من واحد دارها قبل البوعزيزي صح من نيتكم حسبتو الموت والنار ولات لامود والناس يموتو برك باش يكتب عليهم الجرنال وتهدر عليهم الجزيرة؟ونسيتو الميزيرية الي عايشين فيها؟ وما شفتوش التامارا والحقرة؟ كي شغل ما راكمش عايشين معانا وتشوفوا كيفاش يتحرقو عصاب الواحد الف مرة في اليوم...في السبيطار وفي البلدية والدايرة وفي الكار...وفي البوسطا...وين ما تروح تلقاها مغلوقة في وجهك يا لطيف...هاد انت اللي اللي خرجت روحك باش تتخرج من الجامعة تسوفري هكدا...جرب برك حط روحك في بلاسة واحد لي ما قدرش يكمل قرايتو خاطر وليد زاوالي...ومالقاش لا صنعة لا شكون يفهمو وينصحو...والناس كامل يخزرو بنص عين...لادار لا دوار لامرا لا دراري...حتى حق قهوة ما عندوش...واش يقدر يكون هادا؟ مشروع ارهابي ولا حراق ولا سراق ولا يقتل روحو...ماكاين حتى حل ... انا وحدة من الناس....نحشم من هادو الناس...ونحير فالكوراج منين يجيبوه....نحشم على خاطر نحن لي زعما جامعيين...ماقدرنا نديرو والو...ماقدرناش حتى نقولو كلمة الحق....بلي هادو الناس ولاد دزاير....وعندهم الحق يعيشو فيها ويلقاو خدمة ودار يباتو فيها....قبل ما نقولولهم واش عملتو لدزاير...لازم قبل نعطيوهم الفرصة ...يخدمو بصح هكدا...رانا كيما الحكاية لي على القدافي وما نعرف...ادا كانت تمسخيرة ولا صح...تعرفوا مع القدافي كل شيء ممكن...قالك القدافي امر باعدام كل من يتجرا على الانتحار حرقا...يعدموه بعد ما يموت...ادا خرجت هاد الهدرة من القدافي نفهموها...بصح كي يقولوها شباب زعمة زعمة قاريين ومتقفين...تماك يحبس راسك تع الصح