#ماتهدرش_باسمي
مايهدرش بن فليس باسمي.. وطبعا مايهدرش بيه بن قرينة ولا قنوات العار
اذا كان المنابر الإعلامية غير للي يقول نعم سيدي
#ماتهدرش_باسمي .. بصح كي نهدر لازم تسمعني
وكي نقول لا.. يكون كاين منبر يوصل صوتي.. ماشي تتحتم عليا نخرج للزنقة
اوتزيد اللافتتات و الغناء وصرخات الرفض يديها الريح..
#مايهدرش_باسمي معارضي الخارج أوك
بصح كي معارض الداخل لي صوتو مسموع تخونوه وتسجنوه..
طبيعي يبقى صوت الجزائريين المغتربين حر وعالي ويغم صوت الشياتين ويقلقكم..
بصح ماتقدروش تتجاهلوهم ولا تمنعوهم خاطر راهم دزيريين كيفك وكيفي
***
ماهوش ذنبي اذا زيطوط والياس رحماني هدرو باسمي.. مادام مادافعتش عليهم ورفدت تصاورهم.. ماتقدرش تحاسبني بيهم..
كيما ماهوش ذنبي كي شياتي الافلان والارندي يهدرو باسمي.. كيما راهم رايحين يعفسو الحراك ويندبو لمستقبل لبلاد بإسمك وصوتك وموافقتك
ذنبي كي نسكت ونقبل بنفس الظروف ونفس السيناريو لي طيحت قدرنا وخلاتنا ضحك بين الأجناس
ذنبي كي نقبل انتخابات بالاعلام الموجه من بقايا العصابة .. في ظل حكومة العصابة
انتخابات مايقدرش يترشح فيها غير الأرانب لقديمة والمجانين
انتخابات تتحتم عليا نقبل بالرئيس لي يخرج منها يحكمني خمس سنين بدستور خدمو بوتفليقة خدمة الروح للروح.. بلا مانتوقع يولي ديكتاتور
ذنبك كي راك حاب تمحيني وتفاسيني.. وانت عايش فالهم كيفي.. وكي تدخل البلاد فالحيط.. دمك يتخلط مع دمي.
ذنبك كي راك قابل وراضي تضرب الحراك وانتفاضة 88 في زيرو وترجعنا قرن للور
انا مانسكتش ونقعد نقول لا.. هاذي الطريق غالطة.. واذا تجاهلتوني.. نكون رضيت ضميري وتحملو مسؤولية الفشل وحدكم
الأحد، 22 سبتمبر 2019
#ماتهدرش_باسمي
الاشتراك في:
تعليقات الرسالة (Atom)
ليست هناك تعليقات:
إرسال تعليق